నేనే లెజెండ్-2

అక్కడంతా కోలాహలంగా ఉంది. అది సినీమహోత్సవాల సందర్భంగా రిహార్సల్స్ జరుగుతున్న ఆడిటోరియం. పెద్ద పెద్ద తారలు చాలా ఓపిగ్గా స్టెప్పులు ప్రాక్టీస్ చేస్తున్నారు. యువవజ్రం బాలబాబు లాంటి మెగా హీరో కూడా అలుపన్నది లేకుండా గంట నుంచీ ప్రాక్టీస్ సెషన్లోనే ఉన్నారు. చిన్న వయసు హీరోయిన్లు కూడ ఆయనతో పోటీ పడలేక మాటి మాటికీ విరామం తీసుకుంటున్నారు. సినీమహోత్సవాల సందర్భంగా మేటి దర్శకుడు రాజేంద్ర రావు దర్శకత్వ పర్యవేక్షణలొ యువ దర్శకుడు వంశీకృష్ణ దర్శకత్వంలో చిత్రపరిశ్రమలోని మేటి హీరో హీరోయిన్లందర్నీ పెట్టి ఒక ఉత్తేజకరమైన పాటని చిత్రీకరించాలని ఆర్గనైజింగ్ కమిటీ నిర్ణయించింది. ఆ నిర్ణయాన్ని అందరు హీరోలూ హీరోయిన్లూ ఆనందంగా స్వాగతించారు.

ఆడిటోరియంలో ఒక వైపు ఆ పాట చిత్రీకరణ కూడా శరవేగంగా జరుగుతోంది. అక్కడ మేచోస్టార్ దర్శక రాజేంద్రునితో ఉత్సాహంగా ముచ్చటిస్తూ ఉన్నారు. ఇంతలో ఒక అసిస్టెంట్ వారిని సమీపించి మేచోస్టార్ తో , "సార్ మీకోసం ఎవరో అభిమానులు వచ్చారు" అని చెప్పాడు నెమ్మదిగా. "ఓహ్ అలాగా, వాళ్ళని వెయిటింగ్ రూం లో కూర్చోబెట్టీ ఏమేంకావాలో అడిగి ఇప్పించు. ఒక అయిదు నిముషాల్లో షాట్ ముగించుకుని వస్తాను" అని చెప్పి, షాట్ కోసం చక చకా సెట్ మీదికి వెళ్ళారు. ఆరేడు నిముషాల్లో ఆయన వెయిటింగ్ రూం లోకి ప్రవేశించారు. "సారీ కొంచెం లేటయ్యింది. ఇప్పుడు చెప్పండి. ఎలా ఉన్నారు? ఎక్కడ నుంచి వచ్చారు?" అంటూ ప్రశ్నలతో ముంచెత్తుతున్న తమ అభిమాన హీరోని చూసి మాటలు రాక నిలబడి పోయారు వాళ్ళంతా. ఒకడు మాత్రం తేరుకుని "బాగున్నం సార్. మీరెట్లున్నరు సార్? చాన దూరం నుంచొచ్చినం సార్. మిమ్మల్ని కలుస్తమనే ఆశ గూడ లేకుండె. మిమ్మల్ని జూడగనే మాటల్ రాటం లేదు సార్.." అని అంటూండగనే ఆయన కల్పించుకుని "అప్పుడప్పుడూ షూటింగ్ పనుల్లో బిజీగా ఉండి అభిమానుల్ని కలవటానికి సమయం సరిపోదు అంతే. సరే మీరంతా ఏం చేస్తూ ఉంటారు?" అన్నారు.

వాళ్ళలో చాలా మంది స్టూడెంట్స్. కొందరు ఉద్యోగాలు చేసేవాళ్ళూ ఉన్నారు. మేచోస్టార్ అభిమాన సంఘాలు పలు సందర్భాల్లో రాష్ట్రమంతటా రక్తదాన శిబిరాలు నిర్వహిస్తూ ఉంటారు. తమ అభిమాన హీరో నిర్వహించే 'బ్లడ్ బ్యాంక్' మరియు 'ఐ బ్యాంక్' లకు ప్రచారకర్తలుగా వ్యవహరిస్తూ ఉంటారు. రాష్ట్ర సినీ చరిత్రలో ఇటువంటి కార్యక్రమాల్ని ఇంత పెద్ద ఎత్తున నిర్వహించిన సినీ హీరో లేనే లేడు. మహా నటుడు, మహా నేత, విశ్వ విఖ్యాత నట చక్రవర్తి తరువాత ఇంత ప్రజాదరణ పొందిన నటుడు కూడా లేనే లేడు. అందుకే ఆయన్ని చాలామంది "లివింగ్ లెజెండ్"గా పరిగణిస్తారు. అభిమానులైతే ఏకంగా దైవంతో సమానంగా చూస్తారు. అవును మరి, సినీ హీరో అభిమానులమని చెబితేనే జనం ఒక రకంగా చూసే స్థాయి నుంచి, మేచో స్టార్ ఫ్యాన్స్ అంటె అభిమానంగా, ఒకింత గౌరవంగా కూడా పలకరించే స్థాయికి తీసుకు వచ్చిన ఘనత మేచోస్టార్ కే దక్కుతుంది.

అభిమానుల్తో మాట్లాడుతుండగానే స్టార్ ప్రొడ్యూసర్ రాగానాయుడు గారు వచ్చి "కొంచెం ఇలా రాగలరా" అన్నట్టు దూరం నుంచి సైగ చేశారు. చిరునవ్వుల్తో అభిమానుల్ని సాగనంపి వచ్చారు మేచోస్టార్. "మీతో కొంచెం మాట్లాడాలి, ఇలా రండి" అంటూ గదిలోకి తీసుకెళ్ళారాయన. అక్కడ సినీమహోత్సవ ఆర్గనైజింగ్ కమిటీ మొత్తం కూర్చుని ఉంది. అందరూ ఆందోళనగా ఉండటం గమనించి "ఏమైంద"న్నట్లు కనుబొమ్మలెగరేశారు మేచోస్టార్. "ఏముంది, ఎప్పుడూ ఉండే సంతే. ఆ జోకర్ బాబు సన్మానం గురించి. ఇప్పటికే సినీమహోత్సవ ముగింపు పాటలో నటించమని ఆహ్వానించటానికి ఫోన్ చేస్తే నన్ను బండ బూతులు తిట్టాడు. కారణం కూడా చెప్పలేదు. ఇప్పుడు ఆయన సన్మానం గురించే అందరి భయమూ. గడసరి గారి పుణ్యమా అని ఇప్పుడీ కమలశ్రీ బిరుదు కూడా వచ్చింది కదా. అసలు మొన్ననే నన్ను లెజెండ్ గా గుర్తించి సన్మానం చేస్తేనే ఫంక్షన్ కైనా వస్తానని అటకెక్కాడు. అక్కడికీ చెప్పా. నిన్ను లెజెండ్ గా సన్మానిస్తే జనాలు మమ్మల్ని ఎగరేసి తంతారూ అని. ఒప్పుకుంటాడా దరిద్రుడు!! ఇప్పుడు కనీసం ముఖ్య మంత్రి గారితోనైనా సన్మానం జరిపించకపోతే మళ్ళీ బయట ఏ ప్రెస్ కాన్‌ఫరెన్సో పెట్టి అడ్డమైన మాటలూ మాట్లాడతాడు. అరచంద్ గారేమో మీకు లెజెండ్రీ పురస్కారం ఇవ్వాలనుకోవటమే జోకర్ బాబు అలుకకు కారణం కాబట్టి అది ఆపేద్దాం అంటున్నారు.మిగతా కమిటీ మొత్తం ఇవ్వాల్సిందే అని పట్టుబడుతోంది. మీకో మాట చెబుదామని నేనే పిలిపించాను" అన్నాడు కమిటీ కన్వీనర్ ఎ.యస్.రాజారావు. "అదేంటండీ!! నాకు లెజెండరీ పురస్కారమా? అంత పెద్ద పెద్ద వారుండగా నాకా? బాగుండదండీ. అరచంద్ గారన్నది నిజమే" అంటుండగా మధ్యలోనే రాగానాయుడు గారు కల్పించుకొని "వారంటున్నది కరక్టే. నువ్వు అందుకు అన్ని విధాలా విధాలా అర్హుడివి. మరేం మాట్లాడకు. గడసరి గారు కూడా పదే పదే చెప్పారు. వాడి సంగతేదో ఆయనే మానేజ్ చేసుకుంటామన్నారు" అని రకరకాలుగా సర్ది చెప్పారు. మిగతా కమిటీ అంతా పదే పదే అదే చెప్పేసరికి మేచోస్టార్ "అలాగేనండీ మీ ఇష్టం. నాకు మాత్రం ఇది పూర్తిగా అంగీకారం కాదు" అంటూ ఏదో ఆలోచిస్తూ బయటికి నడిచారు.
(ఇంకా ఉంది)
*****************************************************************************

నేనే లెజెండ్

తెలవారింది. అలవాటుగా అమ్మనా బూతులు తిడుతూ నిద్ర లేచాడు జోకర్ బాబు. అతని అసలు పేరు 'సప్తశలభమో','సుప్తకంకాళమో' అని... ఏదో అలాంటిదే. సినిమాల్లో చేరిన కొత్తలో ఆ పేరు విని జనం పొట్ట చెక్కలయ్యేలా నవ్వుకుంటుంటే చూడలేక ఆయన గురువుగారు శ్రీ గడసరి పద్మనాభరావు గారు 'జోకర్ బాబు' అని నామకరణం చేశారు. తరువాతి కాలంలో, తాను జోకులెయ్యక పోయినా తనే ఒక జోకుగా మారి సార్థక నామధేయుడయ్యాడు. మనోడికి కోపం ముక్కు మీదనే ఉంటుంది. ముక్కు కూడా బాగా పొడుగ్గానే ఉంటుంది. "నేను ముక్కుసూటిగా వ్యవహరిస్తుంటా"నని అందరి ముందూ డబ్బా కొడుతుంటాడు కూడా. ఊరికే చిరాకు పడిపోవటం, ఎదురొచ్చిన ప్రతి వాడి మీదా ఒంటి కాలిపై లేవటం అతనికి అతి సహజమైన అలవాట్లు.

ఈ రోజు ఇంత ఉదయాన్నే తననెవరో నిద్రలేపటంతో విపరీతమైన కోపంతో లేచాడు. ఎదురుగా పెద్ద కొడుకు కిష్టు బాబు. "ఏంట్రా"? అని అరిచాడు. "నాన్నా అదీ..." అంటూ నసిగాడు భయంగా. "తొందరగా చెప్పి చావు",కసిరాడు జోకర్ బాబు. ఎందుకైనా మంచిదని ఒక రెండడుగులు వెనక్కి జరిగాడు కిష్టు. "అదీ.. మీకు ప్రభుత్వం కమలశ్రీ అవార్డు ఇచ్చింది", అని చేతిలోని న్యూస్ పేపర్ చూపించాడు.

సడెన్ గా గుర్తుకు వచ్చింది జోకర్ బాబుకి, గురువుగారు నిన్ననే తనతో ఫోన్లో మాట్లాడిన విషయం. "అయితే ఇచ్చిన మాట నిలబెట్టుకున్నాడన్నమాట". ఆనందంతో కిసుక్కుమని నవ్వుకున్నాడు. ఆ నవ్వు చూడగానే కొంచెం ధైర్యం వచ్చింది కిష్టుకి. "వాల్లెవరో ఉదయం నుంచీ వెయిట్ చేస్తన్నారు. పూలూ, పల్లూ తెచ్చారు" అన్నాడు ముద్దముద్దగా.

"అయితే మాత్రం, ఇంత ఉదయాన్నే నిద్ర లేపుతావా, నాలుక మందం వెధవా..." అంటూ మళ్ళీ లంకించుకుంటుండగానే పెడసరంగా వినిపించిందొక గొంతు,"ఇప్పుడు తొమ్మిదయ్యింది. క్రమశిక్షణ పేరుతో మాకు వాయగొట్టడం కాదు. నువ్వూ కొంచెం నేర్చుకో".

ఆ గొంతు చిన్న కొడుకు కనోజ్ ది. వాడికి వయసు తక్కువైనా "మొరిగే కుక్కలు కరవవని" బాగా తెలుసు. అందుకే తండ్రి గ్రామసిం హగర్జనలకి పెద్దగా భయపడడు. పైగా ఒక్కోసారి కిందా మీదా పడి నవ్వుతాడు కూడా. అందుకే వాడంటే జోకర్ బాబుకి లోలోపల చాలా భయం. కానీ వాడి దగ్గిర కూడా అప్పుడప్పుడూ లేనిపోని డంబం ప్రదర్శిస్తూ ఉంటాడు. అందుకే, " రేయ్ నీకు బొత్తిగా క్రమశిక్షణ.." అంటూ ఏదో అనబోయి, మళ్ళీ వాడు నోరు తెరిచాడంటే కింద హాల్లో ఉన్నవాళ్ళ దగ్గిర తన ఇమేజి దెబ్బ తింటుందన్న విషయం గ్రహించి నోరు మూసుకున్నాడు. వాడి గొంతు వినిపించినవైపు గుడ్లురిమి చూశాడు. అప్పటికే అక్కడినుంచి వెళ్ళిపోయాడు కనోజ్.

పట్టరాని ఉక్రోషంతో మంచం మీది నుంచి లేచి విసురుగా కిష్టు చేతిలోని పేపర్ లాక్కుని చర చరా బెడ్ రూంలోంచి బయటకు నడుస్తుండగా పూజ గదిలోంచి హారతి పళ్ళెంతో నవ్వుతూ ఎదురొచ్చింది శ్రీమతి. " హారతి తీసుకోండి " అంటూ పళ్ళెం ముందుకు చాచింది. పిచ్చి కోపమొచ్చింది జోకర్ బాబుకి. ఎడంచేత్తో విసురుగా పళ్ళేన్ని ఎగరగొట్టాడు. అది స్లో మోషన్ లో గింగిరాలు తిరుగుతూ కింద హాల్లో ఉన్న అనుచరగణం మధ్యలో ల్యాండ్ అయ్యింది. వాళ్ళు అదిరిపడి సోఫాల్లో ఎగిరెగిరి పడ్డారు. " ఏమైందండీ?", అని భయంతో కొద్దిగా హెచ్చు స్వరంతోనే అడిగిందావిడ. మరుక్షణంలో ఆమె చెంప ఛ్హెళ్ళుమంది.

ఆడవాళ్ళెవరైనా తనముందు కొంచెం గట్టిగా మాట్లాడితే అస్సలు నచ్చదు జోకర్ బాబుకి. అలా మాట్లాడ్డం ద్వారా వాళ్ళు పదిమందిలో చులకన అయిపోతారని అతని భావం. అలాంటి సమయాల్లో వాళ్ళ గౌరవం నిలబెట్టడానికి ఇలా శాయశక్తులా కృషి చేస్తుంటాడు. గతంలో తన సొంత సినిమా 'ఎదరాయుడు ' షూటింగ్ లో ఇలాగే ఒకసారి తనను ఏదో విషయమై నిలదీసి అడిగిందని సీనియర్ నటి వాసంతి చెంప చ్హెళ్ళుమనిపించాడు . అప్పట్లో అదొక పెద్ద ఇష్యూ అయ్యింది కూడా. అలాగే కిష్టు సినిమాలో పరిచయం చేసిన యువ హీరోయిన్ పరువు కూడా పదిమందిలో ఒకసారి కాపాడాడు.

ఇప్పుడు తన భార్య పరువు కాపాడ్డమే కాకుండా కిందున్న అనుచరగణాన్ని కూడ భయపెట్టగలిగాడు. ఒక్క దెబ్బకి రెండు పిట్టలన్నమాట.


" ఏంటే?? నాకింత అవమానం జరిగితే నువ్వు ఇకిలిస్తూ హారతి తెచ్చావ్? నువ్వు కూడా ఆ మేచోస్టార్ అభిమాన సంఘంలో చేరిపొయ్యావా?" గద్దించాడు. "అవార్డు రావటం అవమానమేంటి? దీనికీ మేచోస్టార్ కీ సంబంధమేంటీ?" అని అడగలేదామె. విషయం అర్థమయ్యిందామెకి. "నిన్నటిదాకా గురువు గారిని శతపోరి ఈ అవార్డు ఇప్పించుకున్నాడు, ఇప్పుడు దాన్ని ఎలా ఉపయోగించుకోవాలా అని చూస్తున్నడన్నమాట ముదనష్టపోడు " అనుకుందామె.

"మొన్నటికి మొన్న ఆ మేచోస్టార్ కి కమల భూషణ్ అవార్డు నిచ్చి నాకు మాత్రం కమలశ్రీ ఇస్తారా?" గర్జించాడు జె.బి.

అనుచరగణం ఒఖ్ఖ ఉదుటున తాము తెచ్చిన పూలూ పళ్ళూ దండలూ సోఫాల కిందకి తొసేశారు. ముఖాల్లో నవ్వుల్ని మాయం చేసి తలా ఒక గరిటెడు బాధ నింపుకున్నారు. జె.బి.విస విసా మెట్లు దిగి వచ్చేలోపే ఎవరికి వాళ్ళు కొత్త కొత్త స్క్రిప్ట్ లు తయారు చేసుకున్నారు. పాపం ఈ గణమంతా ఈయనగారి కొత్త ప్రొడక్షన్ లో పని చేస్తున్నారు. వీళ్ళలో చాలా మందికి ఈ కొత్త సినిమాయే మొదటి అవకాశం. సీనియర్ టెక్నీషియన్లు జోకర్ బాబుతో పని చెయ్యటం ఎప్పుడో మానేశారు. అందుకే ఇలా కొత్త వాళ్ళకు ఛాన్సులిచ్చి వాళ్ళతో తన అనుచరగణంలో ఖాళీలు నింపుకుంటుంటాడు జె.బి. ఆ విధంగా ఎప్పటికప్పుడు ఒక నలుగురిని తన చుట్టూ తిప్పుకోగలుగుతుంటాడు.

" ఏంటయ్యా ఇలా వచ్చారు?" నవ్వుతూ వాళ్ళని సమీపించి చాలా కాజువల్ గా అడిగాడు. ఎప్పుడూ తనని 'పనికి మాలినోడా', 'చెత్త నా @@@@' అని తప్ప ఇంత గౌరవంగా పిలవని ప్రొడ్యూసర్ గారు అలా మర్యాదగా మాట్లాడేటప్పటికి గిర్రున కళ్ళల్లో నీళ్ళు తిరిగాయి ఒక కుర్ర అసిస్టెంట్ డైరెక్టర్ కి. "స్సార్ హ్హెంత ఘోరం ఝరిగి పోయింది స్సార్? మీఖు హట్లాంటి హవార్డు ఇయ్యడమేంది స్సాహ్ ర్ ర్" అని భోరుమంటూ ఇందాకే తయారు చేసుకున్న కొత్త స్క్రిప్ట్ చదివడం మొదలు పెట్టాడు. కానీ ఆ ఎమోషన్ లో, ప్రొడ్యూసర్ గారి మొహం లో రంగులు మారుతుండటం పసిగట్టలేకపోయాడు. (ఇంకా ఉంది)

**********************************************************************************